KONOBA MUGA ĆAĆE
KONOBA MUGA ĆAĆE
Konoba muga ćaće
ni puno zapacovala
ol potribe
u sebi je sve imala
moli tisak
u kantun
polmazona loza
i zbolcun
Na bragote domijone
u livi kantun
karatil
lakomica i baril
Šoto bodnja
velo pila
ol mašta
jelna manjo
za turnat
još dvi bacve
i na njima manigin
boce
pirja
botiljun
travarica
i bocun
Šoto skol molo bacva
dvi šešule i cidilo
ol dižice lno se rasušilo
a na zid
visi librić
ma ne librić
nego korta
ol cimenta
tote se markovalo
koko i ca se
kal dognalo
Makina ol polivonjo
Vermurel
sogula i arganel
šumice za užeć
bokun dor
za ispeć
lumbr℮la
engleski klobuk
urdenje za namećat
ol cesmine jedon bat
procak
kosir
koseracu
tanaje
i mlotac
sve je to
deperol otac
a za gredu
niz brokun
vise vriće i tartajun
jelna izgoreno sumparela
na retoj ol fundifera
dvi baćike
ol žeromada
i sošice
ol rogocih
puno vrić
i samor
ma u bunjac
je stol tovor
poluga
i karatili
za turnat
opereno lisa
još se užo
deperat
na misto je
grotac
sićic
i kajin
pićona ol mašta
i provinj
ol rakije
ma jo vej
neznon di je
a ca ću sal
provinjat
kal je ćaća
išal spat
u vrimenu
vrime se izilo
mlode kjice
ni se nasodilo
a niz caval na plafun
visi pensir i tvuj trud
a umisto tarkije
visi pos ol konopcića
gamaše i storo vrića
modri terliš
izmendone gaće
u konobu muga ćaće
BRUJET
Portili smo pul škoja
na škafu su
parangoli i mriže
ala buta
neka se tu dviže
Gle jastoga
vidi hlapa
onu ovcu i brancina
na vu bondu je škarpina
i još konter
solpa pagar
pic boka
pauk trija
bit će brujet olavija
Na žeravu isto može
gradikule vej se meću
a repima još trepeću
averijte i voltojte
da ne izgori dulnjo bonda
vode u škrip mi je bevonda
Oparćojte onu teću
na kordur je režentojte
buta nutra sal mišoncu
za ne izgubit
komišku užoncu
Po ribarsku brujetoda
sve zocine ca se misli
u teću se sal navisi
neka tako tiho kuho
dok se riba ne iskuho
Vonjo paho
voju cini
kušoj malo
je co fali
ne fali vej ništa
nego riži i manistra
Vadi vonka
venja pjate
uz kordur
se nagnjizdili
i sa gušton sve izili
i pecenu
i kuhonu
i manistru
pogucali
i sve pjate izlizali
Ninder boje
nikal slaje
friško riba
storu vino
i bevonda
bokun živjo
pisma se
invijala,
i do doma
podurala
STORI ORMARUN
gore u sufitu
u kantun
stoji stori
ormarun
paucina no nje pala
prašina se ni istarla
noge su na kolonete
varhu vrot
je ornamenat
sa sufiton ni kuntenat
vrotimo se u ditinstvo
kal me mati deperala
u kamaru luštrovala
a pomule i rucice
ko zarcalo se laščili
u meni je sve pahalo
is jubavi se namišćalo
bili lancun i blazinje
kuverture i šćavine
dulnjo roba ol potribe
priko šćopa na pikonte
vise gaće i jakete
dvi tri vešte
za ol fešte
sudorići i kalcete
u skafetu ceko dota
none i nonota
i još ništo bjankarije
ca se još ni raspakalo
za feštu se to cuvalo
naparuc je i lumbrela
klobucić i bagulina
u skaselin sudarin
i žensko buršina
bilo je tote
polvera i piture
i oficij
za molit skonžure
u skatulu ol plisa
dokumente se cuvalo
i pineze zaklopalo
svi u kuću
svi su znali
di su stori
co cuvali
ma to se ni ispancalo
dok je sarce batarjalo
a sal gore
u sufitu
u kantun
stoji stori ormarun
corv ga pomalo ji
dokle duša mirno spi
CORV
Corvi je bilo
Corvi će bit
Vrime ne more
Sve to sakrit
Na kraju bisa
U more grinja
Vorti sve živo
Corv voli drivo
Voli vojku
Jabuku i krušku
Praskvu golicu
Smokvu i oblicu
Grize meso
Beštije svake
Ca nosi peraje
I jimo lake
U gnoju corv
Tribi insekte
Ol žola corvi
Dobri za ješku
U zemju corvi
Cinidu peštu
Ako ga digo
I oservoš
Sumo ga makneš
Na bondu butoš
Da ni corvi
Nebi vridilo
Da ni corvi
Sve bi smardilo
e...ma... sal
dušal je corv
na ekran
priko monki
priko miša
na kompjuter
dušla biša
dekumente
ti iskido
cili trud
ol pusti godišć
slova izbriše
na ekranu
ništa ne piše
ovi corv
niti smardi
niti vonje
nit ga vidiš
nit ga cuješ
ne tarmo zemju
ne vorti drivo
a vorti
dušu i tilo
OL TRUDIH TVOJI
Tvojih trudi
na
tratamenat
tavaja
tvica
tingul
travarica
Tilo tako
u
tarbuh
toci
trude
tvuga tarpeca
Ti si
tvordi tartajun
tuceš timbar
težoškega
tastamenta